Gyanmandu LOGO

Reliable

ताजा

अन्तरिक्ष चित्रकला प्रतियोगिता

ज्ञानमाण्डू।राष्ट्रिय विज्ञान दिवस एवं विश्व अन्तरिक्ष सप्ताहको अवसर पारेर नेपाल एष्ट्रोनोमिकल सोसाइटीले आयोजना गरेको तेस्रो राष्ट्रिय अन्तरिक्ष चित्रकला प्रतियोगितामा क्याम्पियन स्कुलकी सुयेन भट्टराई प्रथम भएकी छिन् । 

भट्टराई ललितपुर लगनखेल स्थित क्याम्पियन स्कुलमा कक्षा आठमा अध्ययनरत छिन् । त्यस्तै कास्की पोखरा स्थित गण्डकी बोर्डिङ स्कुलमा कक्षा सातमा अध्ययनरत छात्र आशिव गुरुङ दोस्रो, काठमाडौँको गोठाटार स्थित द सेलिब्रेसन को एड स्कुलमा कक्षा सातमा अध्ययनरत छात्र अमन बस्नेत तेस्रो र काठमाडौँकै छाउनी स्थित पञ्चकन्या माध्यमिक विद्यालयमा कक्षा आठमा अध्ययनरत छात्रा सरिता रम्तेलले सान्त्वना पुरस्कार प्राप्त गरेको सोसाइटीका अध्यक्ष सुरेश भट्टराईले जानकारी दिए । 

विजयी छात्र छात्रालाई राजधानीमा सोसाइटीको १३ औँ वार्षिकोत्सवको अवसरमा पुरस्कृत गरिनेछ । पहिलो हुनेलाई टेलिस्कोप, तक्मा तथा प्रमाणपत्र, दोस्रो, तेस्रो तथा सान्त्वना हुनेलाई तक्मा र प्रमाणपत्र प्रदान गरिनेछ । पहिलोलाई काठमाडौँ स्थित मेक इन्जिनियरिङ कलेजले २०७५ सालदेखि प्रोत्साहन स्वरूप टेलिस्कोप पुरस्कार प्रायोजन गर्दै आएको छ । 

आधारभूत शिक्षा लिइरहेका विद्यार्थीका लागि वि. सं. २०७४ देखि हरेक वर्ष प्रतियोगिता आयोजना गरिँदै आएको छ । आधारभूत तहदेखि नै विद्यार्थीमा वैज्ञानिक खोज अनुसन्धानप्रति रुचि जागोस् भन्ने उद्देश्यले प्रतियोगिता आयोजना गर्न थालिएको सोसाइटीले जनाएको छ । प्रतियोगितामा देशभरका १०७ आधारभूत विद्यालयमा अध्ययनरत विद्यार्थीले भाग लिएका थिए ।रासस 

IME