Gyanmandu LOGO

Reliable

ताजा

Ad Above News Title

दीक्षान्तमा पदक पाउने विद्यार्थी भन्छन् ‘मुलुकमा नै सेवा गर्ने हो’

ज्ञानमाण्डू। त्रिभुवन विश्वविद्यालय (त्रिवि)बाट विभिन्न विषयमा उत्कृ स्थान हासिल गर्न सफल विद्यार्थीले अध्ययनपछि नेपालमा नै सेवा गर्ने बताएका छन् । त्रिविको ४५औँ दीक्षान्त समारोहमा चान्सलरसहित तीन पुरस्कार पाउने विराटनगरका उमेश आचार्यले भविष्यमा नेपालमै सेवा गर्ने बताए ।

अहिले नेपाल टेलिकममा वरिष्ठ इञ्जिनीयरिङसमेत रहेका उनले भने, “अहिले पनि म सरकारी सेवामा छु, यही सेवामा रही मुलुकको सेवा गर्ने हो ।” मेहनतको फल पदक पाएपछि राष्ट्रिय भाव अझ जागृत भएको महसुस आफूलाई भएको उनले बताए । पुल्चोक इञ्जिनीयरिङ क्याम्पसबाट स्नातकोत्तर तहमा ९१.७३ प्रतिशत अङ्क ल्याएका आचार्यले दीक्षान्त समारोहको ठूलो पुरस्कार चान्सलर पदक पाएका छन् । चान्सलर पदक त्रिविमा सर्वोकृष्ट अङ्क ल्याउने विद्यार्थीलाई प्रदान गरिन्छ । सो पदकमा करीब तीन तोला सुन रहेको हुन्छ । चान्सलरसहित उनले त्रिवि प्राध्यापक सङ्घ स्वर्ण पदक र रामप्रसाद मानन्धर स्वर्ण पदक पनि पाएका हुन्। 
 
यसैगरी अर्का तीन पदक प्राप्त गरेका विद्यामान महताराले पनि देश र समाजको सेवा गर्ने बताए । अहिले नेपाल राष्ट्र बैँकमा सहायक निर्देशकको रुपमा कार्यरत रहेका उनले मुलुकमा काम गर्ने वातावरण बन्दै गएकाले यहीँ रहेर सेवा गर्ने सङ्कल्प गरेकाहुन् । “पहिला बाहिर जाने सोचमा थिएँ”, डोल्पा जगदुल्लाका महताराले भने, “नेपाल राष्ट्र बैंकमा नाम निकालेको र दीक्षान्तमा पनि पदक पाएकाले मुलुकमा रहेर नै सेवा गर्ने इच्छा जागेको छ ।” अर्थशास्त्र विषयमा स्नातकोत्तर तहमा ३.८६ सिजिपिए ल्याई सर्वोकृष्ट भएका महताराले खगेन्द्रमानसिंह प्रधान पदक, तारापद चौधरी पदक र चन्द्रराज ढुङ्गोल स्मृति पुरस्कार पाएकाहुन् । 

यसैगरी दुई पदक प्राप्त गरेकी सगीना महर्जनले पनि नेपालमा नै सेवा गर्ने इच्छा रहेको बताइन् । अहिले चावहिलस्थित डियर वाक कलेजमा अध्यापन पेशामा आवद्ध रहेकी उनले आफ्नो क्षेत्रको काम अहिले प्राप्त नभएकाले विदेशमा गई विद्यावारिधि गरेर नेपालमै काम गर्ने बताइन् । रसायनशास्त्र विभागबाट एमएस्सीमा ३.९८ सिजिपीए अङ्क ल्याएकी महर्जनले अमृत पदक र पिएमसी पदक प्राप्त गरेकी छन् । 

सो अवसरमा सर्वोकृष्ट अङ्क ल्याउने विद्यार्थीलाई ३१ पदक÷पुरस्कार प्रदान गरिएको थियो । थमनसिंह गौतम, इशिला खरेल र अञ्जना शर्माले दुई÷दुई पुरस्कार पाएका थिए । स्नातकोत्तर तहमा राजनीतिक शास्त्रमा ६७ प्रतिशत ल्याएका गौतमले ‘ललित चन्द पदक’ र वडाकाजी ‘मरिचमान सिंह पदक’ पाएका छन् । शङ्करदेव क्याम्पसबाट व्यापार प्रशासनमा स्नातक तह (बिबिए)मा ३.९३ सिजिपिए अङ्क ल्याएकी खरेलले भाइस चान्सलर पदक र भ्वाइस सत्य माँ स्मृति स्वर्ण पदक र मानविकी सङ्काय स्नातक तहमा उत्कृष्ट अङ्क ८२.१४ ल्याउने सान्त्वना मेमोरियल बहुमुखी क्याम्पसका विद्यार्थी शर्माले पिपल्स क्याम्पस ‘तीर्थरत्न बज्राचार्य पदक’ र ‘ज्ञानप्रसाद’ पुरस्कार पाएका छन् । 

दीक्षान्त समारोहमा विद्यावारिधितर्फ ८५, एमफिलतर्फ ४०, स्नातकोत्तर तह तथा स्नातक तह उत्तीर्ण गरेकामा कृषि तथा पशुविज्ञानमा १३२, शिक्षा सङ्कायमा ७७१, मानविकी सङ्कायमा दुई हजार ९१, इञ्जिनीयरिङ एक हजार १८६, वन विज्ञान ३३, कानूनमा १८०, चिकित्सामा ८६४, व्यवस्थापनमा तीन हजार ७०३ र विज्ञानमा एक हजार ९८ विद्यार्थी दीक्षित भएका थिए । समारोहमा १० हजार १८४ विद्यार्थी र करीब छ हजार ९०० अभिभावक सहभागी थिए । रासस

Ad After News Content