Gyanmandu LOGO

Reliable

ताजा

४० जिल्लालाई पूर्ण विद्युतीकरण घोषणा गरिँदै

ज्ञानमाण्डू।दक्षिण ललितपुर ग्रामीण विद्युत् सहकारी संस्थाले यस क्षेत्रका करिब छ हजार घरलाई उपलब्ध गराइरहेको छ । बाकी रहेका करिब दुई हजार घरमा छिट्टै वितरण गर्ने संस्थाले जनाएको छ । 

संस्थाको १८औँ वार्षिक साधारण सभाको शनिवार सांसद नवराज सिलवालले उद्घाटन गर्दै ललितपुरको दक्षिण भेग बत्तीमुनिको अँध्यारोको रूपमा रहेको हुँदा विकासमा फड्को मार्न आफूले ध्यान दिएको जानकारी दिए । 

सामुदायिक विद्युत् उपभोक्ता राष्ट्रिय महासङ्घका अध्यक्ष नारायण ज्ञवालीले महासङ्घमार्फत मुलुकको ५३ जिल्लाका ३०० सहकारी संस्था मार्फत साँढे पाँच लाख घरधुरीमा विद्युत् सेवा पु¥याएको बताए । “सरकारले मुलुकको ४० जिल्लालाई पूर्ण विद्युतीय घोषणा गर्न लागेको छ । ” -उनले थपे। 

नेकपाका ललितपुर जिल्ला इन्चार्ज हरि दाहाल, पूर्व सांसद सुशीला नेपालले दक्षिण ललितपुरका विद्युत् सेवा नपुगेका स्थानमा विद्युत् पुर्‍याउन सबैको ध्यान जानुपर्ने कुरामा जोड दिए । संस्थाका संस्थापक अध्यक्ष डिल्लीप्रसाद घिमिरेले १८ वर्षअघि सञ्चालन गरिएको सो संस्थाका कारण आज दक्षिण ललितपुर क्षेत्रमा झिलिमिली बत्ती बल्न सफल भएको जनाए । संस्थाका लेखा समिति संयोजक नवराज महतले दक्षिण ललितपुर र गोदावरी नगरपालिका वडा नं ७ देवीचौरामा संस्थामार्फत विद्युत् सेवा दिइरहेको बताए । महाकाल गाउँपालिकाका अध्यक्ष रामचन्द्र दाहालले संस्थाले देशका सहकारीलाई पाठ सिकाएर अघि बढिरहेको उल्लेख गरे । 

कोञ्ज्योसोम गाउँपालिकाका अध्यक्ष गोपीलाल सिङ्ताङले संस्थाका कारण हाल दक्षिण ललितपुर क्षेत्रको ७५ प्रतिशत स्थानमा विद्युतीय सेवाको सुविधा पुगेको चर्चा गरे । बाग्मती गाउँपालिकाका अध्यक्ष वीरबहादुर लोप्चनले दक्षिण ललितपुरमा थ्री फेज लाइन जडान गरी सिँचाइ र कारखानाको अवसर भित्र्याउन संस्थाका सदस्यलाई अनुरोध गरे। 

नेपाली काँग्रेस ललितपुरका सचिव रविन्स शर्माले सबै दल मिलेर राजनीतिक प्रभाव नपर्ने गरी सहकारी संस्थामा नयाँ सदस्य चयन गर्न अनुरोध गरे । संस्थाका अध्यक्ष गोविन्दप्रसाद बजगाईँले ललितपुरको १९ वडामा आफूहरूले सहकारी संस्थामार्फत विद्युतीय सेवा दिएको जानकारी दिए । “हामीले १८ वर्षअघि रु ८० लाख २६ हजार ऋण लिएर विद्युत् सेवा पुर्‍याउने काम गरेका थियौँ, त्यसमा हाल रु २६ हजार मात्र ऋण तिर्न बाँकी रहेको छ ।” -उनले थपे। 

अनलाइनबाट विद्युतीय महसुल तिर्ने व्यवस्थाको सुरुआत गरिएको, २७ विद्यालयमा नवीकरणीय ऊर्जासम्बन्धी पाठ्यक्रम लागू गरिएको, उद्यमी महिलाका लागि संस्थाले कर्जा प्रदान गरिएको, महिलालाई आत्मनिरभर बनाउन संस्थाले अभिमुखीकरण कार्यक्रम गर्दै आएको, महाकाल गाउँपालिकाको उन्यूचौरमा विद्युत् प्रवाहका लागि सस्टेशन निर्माण गर्ने योजना अघि बढाइएको कार्यक्रममा जानकारी दिइएको थियो ।रासस

IME