Gyanmandu.com

Infolinks ad

Gyanmandu LOGO

Reliable

ताजा

Ad Above News Title

नेपालगञ्ज समाचारः ‘हात्ती पाइलेविरुद्धको औषधि निर्धक्क सेवन गरौंँ’

ज्ञानमाण्डू।नेपालगञ्ज उपमहानगरपालिकाका चिकित्सकले हात्तीपाइले विरुद्धको औषधि निर्धक्कसँग सेवन गर्न आग्रह गरेका छन् । 

बाँके जिल्लामा माघ २५ देखि २७ गतेसम्म हात्ती पाइले रोग विरुद्धको औषधि खुवाइँदै छ । नेपालगञ्ज उपमहानगरपालिकाको कूल एक लाख ७३ हजार ७९४ जनसङ्ख्यामध्ये एक लाख ४५ हजारले यो औषधि सेवन गर्ने लक्ष्य लिइएको छ । 

यस पटक औषधि खुवाउन विद्यार्थीलाई समेत परिचालन गरिने भएको छ । दुई वर्षभन्दा कम र ७० वर्षभन्दा बढी उमेर समूहका व्यक्ति, गर्भवती र गम्भीर बिरामी बाहेकका व्यक्तिले ढुक्कसँग औषधि सेवन गर्न सक्ने स्वास्थ्य कर्मीले जनाएका छन् । स्थानीय तहले सम्पूर्ण घरमा पुग्नका लागि आवश्यकता अनुसार योजना बनाएर समय निर्धारण गर्न सक्छन् । 

औषधि सेवनपछि रोगको सङ्क्रमण भएका व्यक्तिमा सामान्य असर देखिने भन्दै स्वास्थ्य कर्मीले निर्धक्कसँग औषधि सेवन गर्न सबैमा अनुरोध गरेका छन् । भेरी अस्पतालका डा खगेनद्रजङ्ग शाह, जिल्ला स्वास्थ्य कार्यालयका प्रमुख अंगदबहादुर शाही, दुर्गा गौतमले औषधि निर्धक्कसँग खान सबैलाई अपिल गरेका छन् । 

आधारभूत स्वास्थ्य केन्द्र स्थापना: 

खजुरा गाउँपालिका–४ को इ–गाउँको चोकमा आधारभूत स्वास्थ्य केन्द्र स्थापना गरिएको छ । यसअघि यो वडाका जनताले कपास विकास समिति नजिक रहेको प्राथमिक स्वास्थ्य केन्द्रबाट उपचार सेवा लिँदै आएका थिए । 

गाउँपालिकाका अध्यक्ष किस्मतकुमार कक्षपतिले केन्द्रको उद्घाटन गर्दै गाउँपालिकालाई स्वास्थ्य, शिक्षा र खेलकुदका हब बनाउने बताएका छन्। 

मन्दिर स्थापना: 

नेपालगञ्जस्थित प्रसिद्ध शक्ति पीठ बागेश्वरी मन्दिर परिसरमा माता सरस्वतीको मूर्तिसहित मन्दिर स्थापना गरिएको छ । नवनिर्मित मन्दिरको मन्दिर व्यवस्थापन समितिका अध्यक्षसमेत रहनुभएका नेपालगञ्ज उपमहानगरपालिकाका प्रमुख डा धवलशम्शेर राणाले आज उद्घाटन गरेका छन् । 

नेपालगञ्जका उद्योगपति राजेशनारायण श्रेष्ठ र उनकी धर्मपत्नी अञ्जिता श्रेष्ठले आफ्ना हजुरबुबा स्व हरिबहादुर श्रेष्ठ र हजुरआमा स्व हीरादेवी श्रेष्ठको स्मृतिमा सरस्वती माताको मूर्ति प्राण प्रतिष्ठासहित स्थापना गरेका हुन् ।रासस