Gyanmandu.com

Infolinks ad

Gyanmandu LOGO

Reliable

ताजा

Ad Above News Title

केपिलासगढीमा सामाजिक सुरक्षा भत्ता वितरण बैङ्किङ प्रणलीमार्फत

ज्ञानमाण्डू।केपिलासगढी गाउँपालिकाले सामाजिक सुरक्षा भत्ता बैङ्कमार्फत वितरण गर्ने भएको छ । सामाजिक सुरक्षा भत्ता वितरण प्रणालीलाई पारदर्शी, चुहावटरहित र व्यवस्थित बनाउन चालु आर्थिक वर्षको दोश्रो चौमासिकदेखि लाभग्राहीलाई बैङ्कमार्फत वितरण गर्नेगरी तयारी थालिएको हो । 

राष्ट्रिय परिचयपत्र तथा पञ्जिकरण विभागले पत्राचार गरेपछि गाउँपालिकाले आर्थिक वर्ष २०७७/०७८ देखि अनिवार्य रुपमा बैङ्कमार्फत मात्र सामाजिक सुरक्षा भत्ता वितरण गर्ने तयारी गरिएको गाउँपालिका प्रमुख कृष्णकुमार राईले बताए । बैङ्कमार्फत सामाजिक सुरक्षा भत्ता वितरण गर्ने व्यवस्था गर्न गाउँपालिकाले आगामी पुस मसान्तभित्र आवश्यक कागजात लिएर दाबी बिरोधका लागि पञ्जिकरण शाखामा सम्पर्क गर्न सार्वजनिक सूचना जारी गरेर लाभग्राहीलाई आग्रह गरेको छ । 

दाबी बिरोधका लागि गाउँपालिकाभित्रका सामाजिक सुरक्षा भत्ता खाइरहेका लाभग्राहीको नामावली गाउँपालिका र सम्बन्धित वडा कार्यालयमा प्रकाशन गरिएको गाउँपालिकाले जनाएको छ । गाउँपालिकाका सात वडामध्ये शुरुमा वडा नम्बर–४ बाक्सिला र वडा नम्बर–५ सप्तेश्वरका लाभग्राहीलाई बैङ्कमार्फत सामाजिक भत्ता वितरणको तयारी गरिएको गाउँपालिका प्रमुख राईले जानकारी दिए । 

क्रमशः अन्य वडाका लाभग्राहीलाई पनि बैङ्कमार्फत नै सामाजिक सुरक्षा भत्ता वितरण गर्नेगरी तयारी थालिएको गाउँपालिकाले जनाएको छ । गाउँपालिकामा आगामी मङ्सिरमा सामाजिक सुरक्षा भत्ताको दोश्रो चौमासिक निकासा हुँदैछ । 

गाउँपालिकाको गत भदौ ११ गतेको कार्यपालिका बैठकले चालु आर्थिक वर्षको दोश्रो चौमासिकदेखि बैङ्कमार्फत सामाजिक सुरक्षा भत्ता वितरण गर्ने निर्णय गरेको थियो । सामाजिक सुरक्षा भत्तामा पारदर्शी, चुहावटरहित र व्यवस्थित बनाउन नेपाल सरकारको नीतिअनुसार आर्थिक वर्ष २०७३/०७४ देखि नै बैङ्कमार्फत वितरण गर्ने पहल गरिए पनि अधिकांश स्थानीय तहमा कार्यान्वयन हुन सकेको छैन । 

दश स्थानीय तह रहेको जिल्लामा कर्मचारीमार्फत लाभग्राहीको घरघरमा पुगेर वितरण गरिँदै आएको सामाजिक सुरक्षा भत्तामा अनियमितता हुने गरेको पाइएको छ । पछिल्लो समय साकेला गाउँपालिका–४ मात्तिममा वडाध्यक्ष कृष्णप्रसाद भट्टराईकै मिलेमतोमा सामाजिक सुरक्षा भत्ता वितरणमा अनियमितता भएको पाइएको हो । 

वडाध्यक्ष भट्टराईको मिलेमतोमा लामो समयदेखि सामाजिक सुरक्षा भत्तामा अनियमितता भएको पाएपछि गाउँपालिकाले छानविन शुरु गरेको छ । गाउँपालिका उपप्रमुख सरिता खड्काको संयोजकत्वमा समिति गठन गरेर छानविन शुरु गरिएको हो । 

सामाजिक सुरक्षा भत्ता वितरणमा भएको अनियमिततामा संलग्न जोकोहिलाई कारवाहीको दायरामा ल्याउने गाउँपालिका प्रमुख अर्जुनकुमार खड्का ‘झङ्कार’ले बताए । “मृत्यु भइसकेका व्यक्तिको नाममा, एउटै व्यक्तिको नाम दोहोर्याएर, एउटै नागरिकता नम्बर देखाएर र एउटै जन्म मिति उल्लेख गरेर सामाजिक सुरक्षा भत्ता दुरुपयोग गरेको पाइयो”, खड्काले भने , “आगामी दिनमा यस्तो अनियमितता हुन नदिन दावी विरोधका लागि १५ दिने सूचना जारी गरिएको छ ।” 

गाउँपालिकाले आफ्नो आधिकारिक वेबसाइटमार्फत पाँच वटै वडाका सामाजिक सुरक्षा भत्ता पाउने एक हजर २१४ व्यक्तिको नामावली सार्वजनिक गरेको छ । दावी विरोधका लागि वडा नम्बर–१ बाँझेच्यानडाँडाका ३५५ जना, वडा नम्बर–२ रतन्छाका २९८ जना, वडा नम्बर–३ खिदिमाका १२७ जना, वडा नम्बर–४ मात्तिमका २५९ जना र वडा नम्बर–५ मात्तिमका १७५ जनाको नामावली सार्वजनिक गरिएको गाउँपालिकाका पञ्जिकरण शाखा प्रमुख डिल्लीमान राईले बताए । 

यसअघि जिल्लाको दक्षिणी क्षेत्रमा पर्ने बराहपोखरी गाउँपालिकामा जनप्रतिनिधि र कर्मचारीको मिलेमतोमा सामाजिक सुरक्षा भत्ताको रकम अनियमितता भएको भन्दै अख्तियार दुरुपयोग अनुसन्धान आयोगमा समेत उजुरी परेको थियो । दुई नगरपालिका र आठ गाउँपालिका रहेको जिल्लामा सामाजिक सुरक्षा भत्ता वितरणको नाममा लाखौँ रकम दुरुपयोग हुँदै आएको स्रोतको दाबी छ ।रासस 

Ad After News Content

GME

Enjoy Your Study