कुमारी बैङ्क लिमिटेड र नेपालस्थित प्रविधि कम्पनी कुराकानी अनलाइन प्रा. लि. (निम्बज)बिच ग्राहकहरूलाई थप नवीन तथा डिजिटल सेवाहरू उपलब्ध गराउने उद्देश्यले सहकार्य सम्झौता सम्पन्न भएको छ। उक्त सहकार्यसँगै निम्बजका अन्तर्राष्ट्रिय डेटा सिम तथा अन्तर्राष्ट्रिय सवारी अनुमति सम्बन्धी सेवाहरू कुमारी बैङ्कको मोबाइल बैंकिङ्ग एपमा एकीकृत गरिएको छ।
यस सहकार्यपछि कुमारी बैङ्कका ग्राहकहरूले अब मोबाइल बैंकिङ्ग एपमार्फत नै सहज रूपमा अन्तर्राष्ट्रिय डेटा सिम प्याकेज खरिद गर्न तथा अन्तर्राष्ट्रिय सवारी अनुमतिका लागि आवेदन दिन सक्नेछन्। विदेश यात्रा गर्ने नेपाली, उच्च शिक्षा अध्ययनका लागि विदेश जाने विद्यार्थी, वैदेशिक रोजगारीमा रहेका नेपाली तथा व्यावसायिक प्रयोजनका लागि नियमित रूपमा विदेश आवतजावत गर्ने ग्राहकहरूका लागि यी सेवाहरू विशेष रूपमा उपयोगी हुने अपेक्षा गरिएको छ।
आजको डिजिटल युगमा अन्तर्राष्ट्रिय यात्रा गर्दा भरपर्दो इन्टरनेट पहुँच र आवश्यक यात्रा कागजातहरूको व्यवस्था अत्यन्त महत्त्वपूर्ण मानिन्छ। अन्तर्राष्ट्रिय डेटा सिम सेवाले ग्राहकहरूलाई विदेश पुगेपछि स्थानीय सिम कार्ड खरिद गर्न, सिम परिवर्तन गर्न वा विभिन्न सञ्जाल सेवाको खोजीमा समय खर्च गर्नुपर्ने झन्झटबाट मुक्त गर्दै सहज रूपमा डेटा सेवा प्रयोग गर्न सक्षम बनाउनेछ।
त्यसै गरी, अन्तर्राष्ट्रिय सवारी अनुमति सेवाले विदेशमा सवारी चलाउन आवश्यक अनुमति प्राप्त गर्ने प्रक्रियालाई थप सरल, छिटो तथा व्यवस्थित बनाउँदै ग्राहकहरूलाई आवश्यक सेवा डिजिटल माध्यमबाट प्राप्त गर्न सहयोग पुर्याउनेछ।
यस सेवाको अर्को महत्त्वपूर्ण विशेषता भनेको ग्राहकहरूले अन्तर्राष्ट्रिय डेटा सिम तथा सवारी अनुमति सेवाको शुल्क कुमारी बैङ्कको मोबाइल बैंकिङ्ग एपमार्फत नेपाली रुपैयाँमै भुक्तानी गर्न सक्ने सुविधा हो। यसले अन्तर्राष्ट्रिय सेवा उपयोगका लागि विदेशी मुद्रा भुक्तानीका वैकल्पिक माध्यम खोज्नुपर्ने आवश्यकता कम गर्नुका साथै सम्पूर्ण प्रक्रियालाई थप सहज, सुरक्षित र ग्राहकमैत्री बनाउने अपेक्षा गरिएको छ।
यसबाट ग्राहकहरूको समय, लागत तथा श्रमको बचत हुनुका साथै अन्तर्राष्ट्रिय स्तरका सेवाहरू स्वदेशमै बसेर प्राप्त गर्न सकिने विश्वास लिएको बैङ्कले जनाएको छ।
कुमारी बैङ्क र निम्बज बिच सहकार्य: मोबाइल बैंकिङ्ग एपबाटै अन्तर्राष्ट्रिय सिम र सवारी अनुमति सेवा उपलब्ध हुने
यो खबर पढेर तपाईलाई कस्तो महसुस भयो ?
0%
0%
0%
0%
0%
0%
