ज्ञानमाण्डू। नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले सरकारबाट नीतिगत संरक्षण भए निजी क्षेत्रले छोटो अवधिमै आर्थिक विकासलाई परिणाममुखी बनाउने बताउनु भएको छ । चितवन उद्योग वाणिज्य सङ्घले आयोजना गरेको १३ औँ चितवन महोत्सवलाई आइतबार सम्बोधन गर्दै वरिष्ठ उपाध्यक्ष ढकालले निजी क्षेत्र र सरकारको लक्ष्य एउटै भए पनि सहकार्यलाई नयाँ ढङ्गले अघि बढाउनुपर्ने आवश्यकता रहेको औँल्याउनुभयो ।
“निजी क्षेत्रले कुनै पनि काम अघि बढाउन खोज्यो भने त्यहाँ धेरै तिरबाट अवरोध आउँछन्,” वरिष्ठ उपाध्यक्ष ढकालले भन्नुभयो, “निजी क्षेत्रले लगानी गरेर रोजगारी सिर्जना गर्ने र आर्थिक गतिविधि बढाउने नै हो तर हामीले प्रक्रियागत झमेला नै बढी बेहोर्नुपरिरहेको छ ।”
आइएमएई समूहका अध्यक्षसमेत रहनुभएका ढकालले गैँडाकोटमा निर्माणाधीन केबलकारको भौतिक निर्माणभन्दा प्रक्रिया पूरा गर्न बढी समय खर्चनुभएको स्मरण गर्नुभयो । सरकारले नीतिगत सुधार र निजी क्षेत्रको संरक्षकत्व र अभिभावकत्व लिइदिने हो भने अपेक्षा गरिएभन्दा अगावै आर्थिक विकासलाई परिणाममुखी रूपमा अघि बढाउन आफूहरू सक्षम रहेको उहाँको भनाइ छ ।
बागमती प्रदेशका मुख्यमन्त्री, भरतपुर महानगरपालिकाका प्रमुखलगायतका विशिष्ट व्यक्तिहरू सहभागी समारोहमा वरिष्ठ उपाध्यक्ष ढकालले निजी क्षेत्रले अघि सारेका आर्थिक गतिविधि बढाउने कार्यक्रमलाई सङ्घीय, प्रादेशिक र स्थानीय सरकारले सहयोग गर्नु अपरिहार्य रहेको बताउनुभयो । “तीन वटै तहका सरकारले चाहेको रोजगारी वृद्धि, आर्थिक गतिविधि बढाउने कार्यक्रम नै हो,” उहाँले भन्नुभयो, “निजी क्षेत्र सरकारसँग सहकार्य गर्न तयार छ । सरकारले नीतिगत सुधार गर्ने हो भने छोटो समयमै आर्थिक गतिविधि बढाउन सकिन्छ ।”
सबै तहका सरकारहरूले परम्परागत नियम कानुन परिवर्तन गर्ने आँट गर्नुपर्ने ढकालको धारणा छ । उहाँले निजी क्षेत्रलाई पनि लगानीमैत्री कानुन निर्माणका लागि निरन्तर दबाब दिइरहन सुझाव दिनुभयो । स्थानीय र प्रदेश तहमा जिल्ला नगर र प्रदेश उद्योग वाणिज्य सङ्घले जनप्रतिनिधिहरूलाई झकझकाउनुपर्ने र आफूहरूले सङ्घीय सरकारलाई सल्लाह सुझाव दिने उहाँको भनाइ छ ।
कार्यक्रममा वरिष्ठ उपाध्यक्ष ढकालले चितवनलाई नेपालकै वृहत् पर्यटकीय स्थल बनाउने प्रस्ताव समेत राख्नुभयो । चितवनको अनुपम प्राकृतिक सौंदर्यलाई उपयोग गर्नुपर्ने र नेपालको मध्य भूभागमा रहेका कारण यहाँको पर्यटकीय सम्भावना बढी रहेको उहाँको भनाइ छ । चितवनको सम्पदा सदुपयोगका लागि सरकारबाट विधिवत् निर्णय भए निजी क्षेत्र सहकार्य गर्न तयार रहेको उहाँले बताउनुभयो ।
चितवन महोत्सवले निजी क्षेत्र जस्तोसुकै अप्ठेरो अवस्थामा पनि आफ्नो जिम्मेवारी पूरा गर्न सक्छ भन्ने प्रमाणित गरेको वरिष्ठ उपाध्यक्ष ढकालको भनाइ छ । कोभिडका कारण गत वर्ष हुन नसकेको चितवन महोत्सव यस वर्ष आइतबारदेखि सुरु भएको हो ।
.jpg)
