ज्ञानमाण्डू।बडामहाराजाधिराज पृथ्वीनारायण शाहले नेपाल एकीकरणमा पुर्याएको योगदानको सम्मान स्वरूप उहाँसहित गोर्खाली सेनाले एकीकरणको समयमा गोरखादेखि नुवाकोट हुँदै काठमाडौँसम्म पुगेको पदमार्गमा ‘एकीकरण टर्च’ र्याली गरिने भएको छ ।
नेपाली सेनाको आयोजनामा पृथ्वीनारायण शाहले नेपाल एकीकरणको लागि सुरु गर्नुभएको अभियानअन्तर्गत भोलि शुक्रवार गोरखा दरबारबाट ‘एकीकरण टर्च’ र्याली सुरु गर्न लागिएको जनाइएको छ । गोरखा दरबारबाट सुरु हुने ‘एकीकरण टर्च’ र्याली बोर्लाङ, सल्यानटार, हासेपसल, चरङ्गे, तबईभार हुँदै नुवाकोटको सामरीमा यही पुस २० गते आइपुग्ने जबरजङ्ग गण नुवाकोटका गणपति उदयबहादुर लामिछानेले जानकारी दिए ।
उनका अनुसार पुस २० गते सामरीभञ्ज्याङमा विशेष कार्यक्रम गरेर पुनः नेपाल एकीकरणको समयमा गोर्खाली फौज हिँडेको पदमार्ग पछ्याउँदै म्यागङ मैदान, भैरमकोट, शुभघाट, केउरिनी चौतारो हुँदै आइतबार राति पृथ्वीनारायण शाहले निर्माण गर्न लगाउनुभएको नुवाकोट स्थित साततले दरबारमा ‘एकीकरण टर्च’ र्याली आइपुग्ने कार्य तालिका रहेको छ ।
नुवाकोट दरबार परिसरमा पुस २१ मा विशेष कार्यक्रम गरेर अघि बढ्ने ‘एकीकरण टर्च’ र्याली धरमपानी, शेरास्थित रानीको दरबार, बरबन्दी, चतुराले, ककनी हुँदै काठमाडौँ स्थित सिंहदरबार परिसरमा रहेको पृथ्वीनारायण शाहको सालिकसम्म पुराएर त्यहाँ विशेष कार्यक्रम गरी उक्त र्यालीको समापन गरिने कार्य तालिका रहेको छ ।
“गोर्खाली फौजले विसं १८०१ असोज १५ मा नुवाकोटमाथि विजय हासिल गरेर उपत्यका प्रवेश गर्दै नेपाल एकीकरणको थप सफलताले विशाल नेपाललाई एउटै मालामा गाँस्न सफल भएको सन्देशलाई ‘एकीकरण टर्च’ र्यालीमार्फत सकारात्मक सन्देश प्रवाह गरिने लक्ष्य राखिएको छ”, जबरजङ्ग गणका गणपति लामिछाने भने । लामिछाने, ‘एकीकरण टर्च’ र्यालीमा सहभागी सैनिकले पृथ्वीनारायण शाहको समयमा उहाँको फौजले प्रयोग गरेको जस्तै पोसाक र हतियारमा सजिने हुँदा नेपाल एकीकरणको स्मरण गराई अहिलेका युवा पिँढीलाई देशभक्तिको भावना जगाएर राष्ट्रप्रति जिम्मेवार बनाउन सहयोग पुग्ने विश्वास लिइएको जनाएका छन्।
गोरखा दरबारबाट सुरु भएर धादिङ, नुवाकोट हुँदै काठमाडौँसम्म पुग्ने ‘एकीकरण टर्च’ र्यालीले आसन्न पृथ्वीजयन्तीप्रतिको सम्मान र बुधवारदेखि सुरु भएको नेपाल भ्रमण वर्षका लागि नेपाल एकीकरण पदमार्गमा पर्यटन भित्र्याउन समेत सहयोग पुग्ने अपेक्षा राखेको जनाइएको छ ।रासस
