नारायणी डेभलपमेन्ट बैंक लिमिटेडले असोज २ गतेदेखि हकप्रद शेयर निष्काशन तथा बिक्री खुला गर्ने भएको छ। बैंकले हाल कायम चुक्ता पूँजीको १०० प्रतिशत बराबरको हकप्रद शेयर निष्काशन गर्ने तयारी गरेको हो।
यस अनुकूल, हाल कायम एक कित्ता शेयरधनीले थप एक कित्ता शेयर पाउने गरी बैंकले प्रतिशेयर अंकित मूल्य १०० रुपैयाँका दरले २६ लाख २४ हजार ६७६ कित्ता हकप्रद शेयर बिक्रीमा ल्याउनेछ, जसको कुल मूल्य २६ करोड २४ लाख ६७ हजार ६०० रुपैयाँ हुनेछ।
बैंकले यस प्रयोजनका लागि भदौ ९ गते बुकक्लोज गरिसकेको छ। त्यसअनुसार भदौ ८ गतेसम्म नेप्सेमा शेयर कायम गरेका लगानीकर्ताले मात्र हकप्रदमा आवेदन दिन सक्नेछन्। हकप्रदमा आवेदन दिने अन्तिम मिति असोज २२ गते तोकिएको छ।
इक्रा नेपालले बैंकलाई ‘इक्राएनपी इश्यूअर रेटिङ सी प्लस’ प्रदान गरेको छ, जसले समयमा वित्तीय दायित्व बहन गर्ने क्षमतामा धेरै उच्च जोखिम रहेको सङ्केत गर्दछ।
हकप्रद शेयरको निष्काशन तथा बिक्री प्रबन्धकको जिम्मेवारी ग्लोबल आइएमई क्यापिटल लिमिटेडले लिएको छ। लगानीकर्ताले बिक्री प्रबन्धक, ग्लोबल आइएमई बैंकको भुमही (नवलपरासी) शाखा, नारायणी डेभलपमेन्ट बैंकको केन्द्रिय कार्यालयसहित यज्ञपुरी, टाँडी, पर्सा र नारायणगढ शाखाबाट प्रत्यक्ष आवेदन दिन सक्नेछन्। साथै, आस्बा सेवामा सहभागी बैंक तथा वित्तीय संस्थामार्फत सि–आस्बा प्रणाली प्रयोग गरी वा ‘मेरो शेयर’ अनलाइन सफ्टवेयरमार्फत पनि आवेदन दिन सकिन्छ।
हाल बैंकको चुक्ता पूँजी २६ करोड २४ लाख ६७ हजार ६०० रुपैयाँ रहेको छ। हकप्रद निष्काशन र बाँडफाँटपछि पूँजी दोब्बर वृद्धि भई ५२ करोड ४९ लाख ३५ हजार २०० रुपैयाँ पुग्नेछ। बैंकले हकप्रदबाट संकलन हुने रकम धितोपत्र, सरकारी ऋणपत्र, म्युचुअल फण्डमा लगानी गर्न तथा भौतिक पूर्वाधार विस्तार र शाखा विस्तारमा प्रयोग गर्ने योजना बनाएको छ।
