Gyanmandu LOGO

Reliable

ताजा

Ad Above News Title

पाल्पाबाट ३५० क्वीन्टल तरुल निर्यात


ज्ञानमाण्डू।माघे सङ्क्रान्ति अर्थात् मकर सङ्क्रान्तिलाई तरुल खाने सङ्क्रान्तिका रूपमा पनि लिने गरिन्छ । शरीरको चिसो फालेर ऊर्जा दिनका लागि तरुल खाने गरिन्छ । यस वर्ष पाल्पा जिल्लाबाट मात्रै ३५० क्विन्टल तरुल निर्यात भएको छ । 

जिल्लाको निस्दी गाउँपालिकामा दुई सय क्विन्टल, पूर्व खोला गाउँपालिकामा एक सय क्विन्टल र अन्य स्थानमा उत्पादित गरी करिब ३५० क्विन्टल तरुल निर्यात भएको कृषि ज्ञान केन्द्र पाल्पाले जनाएको छ । 

माघे सङ्क्रान्ति पर्वलाई लक्षित गरी ठुलो परिमाणमा तरुल बाहिरी बजारमा निर्यात गर्न कृषक सफल भएका छन् । रैथाने बालीअन्तर्गत पर्ने तरुल खेतीलाई कृषकले व्यवसायिकरुपमा अझ अङ्गालेको भने पाइँदैन । 

पाखो पखेरा बारीमा तरुल लगाएर कृषकले राम्रो आम्दानी गर्ने सम्भावना रहेकाले यहाँको भौगोलिक भूबनोट मिलेकाले उत्पादन अझ वृद्धि हुने कृषि ज्ञान केन्द्र पाल्पाका प्रमुख शिवप्रसाद अर्यालले जानकारी दिए । 

उनका अनुसार रैथाने बालीअन्तर्गत पर्ने तरुल, कोदो, सखरखण्ड, फापर र बोडालगायतका रैथाने बाली प्रवर्द्धन कार्यक्रम जिल्लामा रहेकाले निस्दी गाउँपालिकाबाट यस वर्ष करिब दुई सय क्विन्टल तरुल काठमाडौँ र बुटवललगायतका बजारमा निर्यात भएको कृषि शाखाका प्राविधिक सहायक खिमराज कोइरालाले बताए । 

“यस वर्ष तरुलको उत्पादन राम्रो भएको छ, कृषकले बाहिरी बजारमा निर्यात गरिरहेका छन्, तरुल विक्री वितरणबाट राम्रो आम्दानी गर्न थालेका छन्” उनले भने । 

निस्दीको मित्याल, झिरुवास, अर्चलेको रनगुवा र गल्धालगायतका स्थानमा तरुलको उत्पादन राम्रो भएको छ । एउटा कृषकले चार सय किलोभन्दा बढीको तरुल उत्पादन गरी विक्री गर्न सफल भएका छन् । मित्यालका अगुवा कृषक सन्तवीर सुनारीले माघे सङ्क्रान्ति पर्वलाई लक्षित गरी ३० हजारभन्दा बढीको तरुल बिक्री गरेका छन् । 

माघे सङ्क्रान्ति बाहेक अन्य समयमा पनि तरुल बजारमा विक्री वितरण भइरहन्छ । माघे सङ्क्रान्तिमा घिउ, चाकु, तिलको लड्डु र विशेष परिकारमा तरुल खाएर मनाइन्छ । माघे सङ्क्रान्तिका दिन बिहानै स्नान गरी घिउ, चाकु, तिलको लड्डु, हरियो सागपात र तरुल खाने, ब्राह्मणलाई वस्त्र दान गर्ने तथा शरीरमा तोरीको तेल लगाउँदा पोषिलो हुनुका साथै निरोगी हुने जन विश्वास छ ।रासस